أنا كنت إيه بالنسبة ليه

أنا كنت إيه بالنسبة ليه؟؟

دا سؤال بجد احترت فيه

يمكن كتاب.. عجبه الغلاف

أو لحن مليان بالخلاف

أو كاس مرير.. ظنه خشاف

وف يوم ما داقه.. حطمه

أو كنت حلم اتمنى إنه يحلمه

يمكن مطر..

يمكن قدر..

شافه خطر لسه ما جاش

يمكن عواصف

ريحها هدت وهم عاشه وهو فاكر انه عاش

يمكن... بلاااااااااش

خللي السؤال محتار كدا

هو الجواب هيفيد بإيه؟؟

انا كنت لعبة بين إديه

كسّرها بعد ما حبها بعقله اللي طاش

واهو راح ما جاش

ولا حتى فكّر وقتها...

هو اللي بالنسبة لي إيه؟

وازاي أنا هشتاق إليه؟

مع إنه عارف..

... هو بالنسبة لي إيه؟

أنا كنت إيه بالنسبه ليه؟