على الصباح وشعشع النور والطير
ساع الرجال الي تعصب غترها
انحيت يم طويق والقرن والنير
وثالوث قفرٍ مابعد من سبرها
فارقت ضول القنص وملاوح الجير
ونزحت صوب الي عظيم ذكرها
حمر النعام الي عليها التقارير
في باب مرجلة الرجال وفخرها
وجدي على ملحاء على مقدم السير
وجد الشويق الي عمِي مابصرها
هزعاً طفاح ولحيها حاضي جفير
جِزل الفقار الي عظيمٍ عمرها
جرد الرقاب النايفات المناوير
جُبر السنام وغاربٍ فهق وارها
عرض الخدود وواسعة المناخير
رق وجباير خف طمنٍ جررها
ترعا الخطر ماعينت للدوواوير
مربعاها مازرفلت من خضرها
من دونها ماينحسب للدنانير
وبالها كم ربطتن قد نثرها
ورث لنا من عادها شلِف وبعير
روس المراجل يامنوّي خطرها
ياماعقرنا خيرها للمناعير
وياما عقرنا مقدمٍ في وبرها
وعلى المغيب وحزة موادع عصير
ساعة زوال الي تخامد شررها
الله يمسي نبع الاشعار بالخير
يوم امتلى طرس الشلي من خبرها
لبيه يابراق عكشٍ مغاتير
شوؤبوبها قفر المعنى غمرها
تزبرت يوم الولي ساقها تحير
وتلاعجت لامر الولي يوم امرها
جادت بغيث فلّجته المعابير
ديمٍ وكنه عقدةٍ من دررها
وكن الندى عقب الرهاش المزابير
ماهو ندى الا عقب ماونس نحرها
تروي عروقٍ ماروتها المباهير
وتسحر فواد قد بطا من سفرها
وتطل كن المبعدات المسافير
مع القمر متربعه في ثغرها
وجدي عليها .. قطع كبدي على سير
ساقي لها وياسعد شوفي لديرها
حرّي عليها حرة مهلهل الزير
على كليب الي غدا في خبرها
الحب يبطش دون عقبا وتبرير
ولك في بيوتي عبرةٍ من عبرها
ياما نفست لهيّبة نافخ الكير
باجٍ لطرقة من تزايد وعرها
عسا الشديد الي نباه المظاهير
نجناجه يفاخت عيون ثبرها
رجوا الوصال الي يسوق التباشير
ولابيوتٍ هذبها من قهرها
على عشير غير … ومجالسه غير
طب الجروح الي عسير جبرها
وجعل الصبا الي هبهبت تبغي تدير
ضيمٍ يحل من المذاري فترها
يعتق صويبٍ ماعتقته المقادير
لو مابرك للمعضلات وكدرها
فانا قتيلٍ دون لاتهب وتذير
زرقاً يلددها السحا من بشرها
فلاذبحني ياعلي فالهوى غير
ريح الصبا الي خنها من شعرها