أحبك ذا ترى أول كلامي.. وآخره كله
ولكن وش يضر اليوم لو تدري عن أحوالي
وخذ ما جاز لك من هالحكي واللي تبي خله
أنا لا قلت ما في خاطري والله ما بالي
وتقدر تغمد السيف الرهيف وتقدر تسلّه
ولكن عند خلاّق البرية علم الأجالي
وتقدر تطوي الدرب البعيد وتقدر تفّله
ولكن صعب تمنع في الهوى صبري وترحالي
حبيبي من يعزك في الهوى ما تقدر تذله
ترى قربك يزيدك بالغلا وان عفتني غالي
متى عمرك سمعت بعاشق قد مات من غلّه
هذاك الحاسد وراعي الهوى تتلفه الأمالي
أحبك كلمةٍ لو هي خطا تغفر لي الزله
وردتك ظاميٍ وان عز وصلك باقطع حبالي
ظلال العاشق جروحه ومن ما يتبعه ظله
أمانة يا شعاع الشمس لا تغضب من ظلالي