هو الوطن يتباع

هو الوطن يتباع!!

طَب تمّنوا الأوجاع

والدّم واللي جاع

وأعطوني سعر كمان

للفقد والأحزان

وأوعدكوا أشوف العرض

هيساوي حضن الأرض

حلم العيال ف الغد

صوت الجدود ف الصدى:

" الأرض وِرد وعِرض"

عَرق الكفوف في الضحى

نبّتْ ف وِلْد الوِلْد

دفا الحيطان ف البرد

دفّاها نفَس الود

وأذاني وقت الفرض هاخده معايا سكات

هيساووا كام يا سادات؟

ولأجل ما هو آتْ

هعمل لكم خصومات

على ذكريات لأموات

وتاريخي اللي فات

وخرايطي هرسمها

باديكو والعلامات

سوق النخاسة اتنصب

من سالف الأزمان

كم تاجروا ف الإنسان

دلوقتي ف الأوطان

سجّل كمان يا زمان

البيع يكون ف العَلَن

كل العيون شايفاه

بس اشتروني معاه

حتى ولو ف الكفن