يابو سعد ضيق الليالي تلاشا
وجيتك على دربي مع الناس ماشي
والا الردي طارف وعنه آتحاشا
وشرواك ياخالد يزيد انتعاشي
الباشه اللي لو علينا تباشا
يبقاله المقدار في وسط جاشي
خل الضما لاهل العقول العطاشا
عندي قضيه ضايعه بالغباشي
شف صاحبي ياصاحبي ماتماشا
مع علمي الغانم وطيب المعاشي
مْن السما ربي عطاه الرشاشا
واخلف عليه مْن الطواريق غاشي
ان جيت له راكز غشاه ارتباشا
واصبح يبيع الغاليه بالبلاشي
ومن علمه البارد حواه انكماشا
من هو يقول الحمل يقواه حاشي
حاولت اجامل بالرضى والبشاشا
لو كان لاشي قلت معذور لاشي
لكنْ ربعه ماتجيب الغشاشا
قومٍ تشوقك بالعزوم البطاشي
ياوافي الجدين وابوك باشا
هات الجواب ومثل ماقيل كاشي