أهني إنسان خالين عن هواجيسه
ولو جاتله ياخذله شوي ثم يسها
وأنا في خفوقي فاتح له منافيسه
هواجيس خلق الله هجوسي تريسها
منامي عن عيوني تبعد مراميسه
ولا تتركه لين السهارى يخامسها
إلى من السهر داعب عيوني نسانيسه
وكدر صفاها، عندي انه يونسها
يفصل علي من خام الأيام ويقيسه
لو أني مابيها قال ملزوم تلبسها
ويفرض علي أستاذ الأيام تدريسه
دروس صعيبه مأحد قبل درسها
لكن البناء معروف يرجع لتأسيسه
والأثمار يأتي طلعها من مغارسها
ودربي صعيب متعبتني تضاريسه
يلين الصخر منها، لو أنه يعايسها
يطاوع لها اللي ساكنن رأسه إبليسه
لو أنها تطيعه لآو مرها فوارسها
وترا الوقت له عادات جيله وفريسه
فريس تعدت دور غبراء وداحسها
لكني بفك الباب وأطلق محابيسه
شوارد خيال شيبت عين حابسها
على ساحة التفكير ياكثر تكديسه
عنيدات ويعكر مزاج تكدسها
لها بّن، تحرق في خفوقي محاميسه
بغيت أتصبر وأحرقتني محامسها
وهي مثل حرب جاهل في متاريسه
وأنا قبلها كان أضرم الحرب ودبسها
لكن البلاء لاصارت الفكرة تعيسه
وتبلشت لي بتعيس وأفكاري تعسها
وأنا اللي هواي الذرب لأقاله أبخيسه
ولا اسمع لها لأقالها غير باخسها
أقولها وخلق الله كلآ على كيسه
وغني الاوأدم ما تكفل أبمفلسها
ومن فلسه ربه، عليم أبتفليسه
ما دامه سليم كل شغله يمارسها
تعاقب على قلب المعنى كوابيسه
مكاين أفكاري متعبتني مكابسها
أيلا من خلي البال غمض أبتنعيسه
حرام على عيني منامي يلامسها
أنا مرهف شعوري ماداني حوا سيسه
خلق لي مشاعر تتعب اللي يعايسها