ماعاد باقي للسهر../ غير عتمه
ماعاد باقي لليالي .. قناديل
مريت طيفك / والتناهيد نجمه
طاحت وانا واقف ../وعكازي الليل
اتنفسك .. ويضيق صدري بكلمه
لو قلتها ../ خايف تفوق المناديل
كل الزوايا تسكب الصمت رحمه
وآنا اصبّك في سكوتي مواويل
محتاج نورك .. قبل ما اموت ظلمه
محتاج صوتك ، والغنا ، والتفاصيل
صارت عيوني في غيابك أئمه
تخطب على منبر من الحلم وتميل
صار الوله والشوق .. للريح نغمه
ترقص معاها انفاسنا رقصة الخيل
في ذمتي .. ماعاد للعشق ذمه
حتى انتهينا في المسافه تماثيل