على عُهدِة أبواق الجُناة:
انُه.. لازماً نِرَستأ حُكمنا
وتعَمَق الهِوة ونِعيش
فوق مَدعو سَحتوت اسمُه عِيش
نسرق مَغانم لنتصار
هَجَامَة بالليل والنهار
بسِنج أو سيوف تعمل حواه
لجل حلم.. حان أوانُه ومُبتغاة!
وعلى عُهدة أبواق الهواة.. الورد اللي عطشان للحياة:
عِيش.. يعني خبز
وخُبز.. يعني حياة
وعشان نحياها لازماً
تكون بعدالة آمنة
تِشبَع فيها البطون.. وسلام يحمِيه الرُعاة
لكل طيف عَ الأرض عُرْفْ..
أو كتاب ورسول إمام
وإحنا كَثرة.. لِيها غَلَبَة
وإسلام
حافظُه رب الكون
عَ الأرض.. وف عُلاه
ضِله مفرودة بمَظلة
نستمد الرحمة فيها من عدالة الولاة
ودي مش أماني مستحيلة والا دا كلام.. سُفاه
في الجو هَبَة.. لا مَر ولا ح يكون مثيلها
هَبّة للصمت اللي جاع
والخزي اللي أعلن الوداع
هبة دموع
وصهيل ح ييزعق مِنتِفض
من صِدر جَفت فيه الضروع
سبحانُه يعلم إيه مداه
ساعتها يا غضب الحليم
فمن سِياط الظلم تنزف جتتَك لبواقي صَبرك
ومع كل آه.. ينشق لَك طريق نجاة
ومخاض حيخرج..
من سد خرسَك اللي كاتمِينُه الطُغاة
كل التاريخ اللي فات.. قال..
الباطل ب يرحل.. ومؤكد بيجُر الليل معاه
والأمراض جميعها زي ما فيها ابتلاء
كمان ربك.. ويا البلاء بيجيب دواه!
حتى الأفاعي.. تلاقي.. في نفس سمومها مَصل
حتى أعتى.. أعتى العُتاة.. والدُعاة
كل الوشوش اللي انطلىَ ع الخلق بسمة لؤمها
إن دَقَق البصير لها.. حتقول خفايا فعلها: إحنا الجُناة
أوعاك من حديث دُعاة.. حِواة
الوطن ما يقهروش.. إلا جهل يوثقُه رغبات طُهاه
وطبيخهُم المسموم ما يهدِم موهبة
أو يصادر الحياة
خليك بصير
وبفطنِتك.. حتعرف اللهو الخفي.. والدُهاه
كل شيخ.. ولُه.. مُرِدينُه
يتبعُه.. ان كان في باطل.. أو في دينُه
طوايف استعلاء تِنَصَب نفسِها عَ الخلق
بحرام.. تِحَلِل!
بظلام.. تِدَلِل!
بجهل مُستنقع غبي يبغىَ الإزاحة
بنظام يحلل قتل أخوه بالغدر أو.. أو بالإباحة!
لاء
العدل.. عدل
واضح.. صريح
مش باجتهاد وميول قبيح
ما احناش في غابة
الأخ يهدِر دم أخوه
ويجيب لُه قاتل بالانابه!
ما احناش في عزبة
كل العهود تتحال في لحظتها لكذبة
العدل.. عدل
يحكم في ظالم.. يِفرِح تَعِيس
بمازورة واحدة للفقير أو للغني أو للرئيس
والرجولة مش بالضرورة تكون.. بملو خانة في البطاقة
الرجولة موقف وطاقة
وإحنا قدمنا المشيئة وقلنا يمكن
تيجي ويااااه الأماني ويبقى ممكن
لكنُه كرسي في كلوب.. خلى كل الدنيا ضلمة
العتمة مش نور.. والقتل مش حرية
العتمة وصمة.. والثورة معنى يلزمُه تضحية
ازاي نبقى إخوة.. قوة.. واحنا..
واحد ناقص واحد
صفر
وصفر زائد صفر صفر
الحكاية مش مُزاحمة
دِيَننا.. شورى.. عدالة.. رحمة
أخر كلامي بقول للي بالي بالُه:
مهمن تكون مُحتاط بلاش..
تحك مناخير اللي شاط
ودعوتك.. ادعيها هنااااك هناك
للي للحظة ما آمن
ان كنت تقدر
أما هنا أنا مسلمة بالغصب عن شاربك
شهدت بالله والرسول والمقدر
الله يهديك.. وتبعد عن بيريز
ياااااااااا عزيزَ مِصر.. كُن عزيز.