حبيبي

حبيبي ..

ياحبيب الخوف

أنا في كل ليل .. آطوف

على بيت الشِعر ..

والصوف

على سجّادة جروحي ، على ترتيلة دموعي

وابسمل كل صوت / ب أوووووف !

ولا ملجأ ولا منجأ

من أيدينك إذا بتشوف !

حبيبي

ياحبيب الخوف ..

ترى إيدينا بعد تكذب ..

اذا ماهي حكي " مُتعِب "

انا مُتعَب ..

انا مُتعَب ..

وفيني جايز المعروف !

حبيبي

وان بغيت تعوف ، انا عايف خيوط الصوف

نسجت من السنين خيام !

ولا غطت ضلوع الجوف !

ويعني مثل .. ماانت تشوف !

ابد ماخانت النخله ، ولاهي قاصر الدلّه !

نعيش ..

ومانفكّر ليش !

حبيبي ياحبيب الخوف

ورب الماء ..

وروحك .. ماء ..

أنا صدري طفل ملفوف !

وفي ظهري

جروح سيوف !

من الأقرب إلى الأغرب ..

وأقول " ضعوف "

وأمرر كل غصّة آه .. وأقول اغفر عشان الله ..

عشان أنك تصير " أكبر "

وانا م " اكبر "

كبر عمري ، وصدري طفل

وأنا حالف " أكون أجمل "

غديت أذبل !

حبيبي .. ياحبيب الخوف

انا من يهدي البسمه

وهو غرقان في همه !

أنا من هو نطق لك تم ..

بروحه قبل هذا الفمّ

وانا ياخي تعبت " اللاء "

وانا أروي كل طير يمّر !

وانا ماني ب لاقي الماء !

وتالي هالضيا

ظلمى !

حبيبي .. ياحبيبي عوف

ولا تستغرب .. وأكذب

انا ماشلت لك غايه ..

انا شلتك مثل آيه !

حبيبي .. ياحبيب الخوف

وليت تشوف !