خذْك الرّحيل البعيد وْغبت عبر الزحام
وتركت لي : وحدةٍ خرسا منَ الثرثرة !
واليوم من تعبر بصوتي يجفّ الكلام
إسمك نديْ لو تجفّ ب إسمك الحنجرة
يا أكثر مْن اعشب بصدري عليك السلام
من رحت عاثوا بصدري وانْهشوا أخضره
و هبّ الزمن : كنت غصْن وصرت هذا الحطام
من يجمع اللي تهشّم فيني وْ يجبره ؟
وكيف أحتمي من هجير الذاكرة لو أنام
ف اللي بقى من ظِلال الشعْر في دفتره ؟
الشعْر ذنب ارتوى منْه الورق ف الغرام
والبعد ذنبك و سال وعطْشت المغفرة
كنت أكتبك للورود وللمطر و الغمام
صرت أكتبك للخريف بْ ذابله وأصفره
كنت اتّسع واجمع بروحي الشجر والحمام
واليوم كنّ الرّمل يجتاحني : بعثرة
والعمْر كنّه منَ الظلّ الطويييل لْ ظلام
يمضي وما للعتَم فِ ايْديّ شمعَ اذخره !
يااا كبر حلم ٍ بنيته و استحال لْ هَدام :
من مبتدا الياس في عيني إلين آخره
حلمْ اشتعل من حطبك وكان برد وسلام
ليه انطفى وإعتلى هذا الرّماد أكثره ؟
ياملح كل الليالي ، و السهر والمنام
ماعاد ليلي رحيييب ٍ مثّْل ماتخْبره
ولا عدت أطيق العبور وكلّ دربي عَسام
من وين ولّيت عيني ماقدرت أعبره
قلت : اعبر الصوت و احايل حبال الكلام
لين أنطقِك ، وان خنقت ب إسمك الحنجرة !