افرح إذا قالوا بني راس

افرح إذَا قَالَوْا بِني راسْ

واحْزَنْ إذَا قَالَوْا بَعَدْنا

وامُوْت لَي قَالَوْا وَد النَّاسْ

واحْيَا إذَا قَالَوا عَبِدْنا

واشهَق إذَا قَالَوْا بالاغْلاس

فِيْ غيبَةْ الوَاشْ انتِظَرْنَا

واطرَب إذَا قَالَوْا در الكاس

مثنى وثلاث الرَاحْ سِجنا

واسمَع إذَا الاحباب جِلّاسْ

واصلَي إذَا العذّال مَعْنا

اخْلُو لَي فوَادي مِ الاحْوَاسْ

قَالَوْا نِبَاه بويت سَكنا

قِلْت: مِحْتِرج قلبي يَا هَالناس

قَالَوْا برايَه اللِّب مَعنا

قِلْت: مِنْهِدِم سَقفَه والأساس

قَالَوْا: بِنَبْنِيَهْ احسَن بنا

قِلْت: ضَيِّجٍ، قَالَوْا فَلَا بَاسْ

لَوْ ضوق ثِقْب ابْرَه يِسَعْنَا

قُوْلُوْا شَ اقول لحِلو الالعاس

قَالَوْا: أجِب، قِلْت: الف اجَبْنَا

ثَرْ فِيْ المحبَّه يضيع لِقْيَاسْ

يومْ العَقِلْ مَاخوذ عَنَّا

وبلا نديم ارباحنا افلاس

لَوْ نَملِك الدنيا بِيَدنا

فِيْ الحُبْ لاجلَه نِخضَع الراس

طاعه ونعصي مِنْ عِذَلنا

وإذَا رضى لَوْ تِزعَلْ النَّاسْ

كِلّهم زَعَلهُم مَا يهِمنا

مَ ادري عِمَل لَي طِب طِلماس

مَ ادري سِحر عينه الوسنا

حَيَّاس عِرج الحُبْ حَيَّاس

شبابنا وشيبنا ابتِلَشنا

دورة رِضاه تدَوِّر الرَاسْ

ونغيب يوم يغيب عَنّا

أقبَل شموسٍ وادبَر اغلاس

ليل شعَرَه كَلْكَل ومِزنا

بِسوس لِمهَلهَل وجَسَّاس

أمن ورِخا مِنْ هَجرَه لنا

أبهَت غَرابينا والاكواس

عودٍ عَلَى الموده تِثَنَّى

حاز الغوى كِلَّه عَنْ النَّاسْ

وحاز الغلا عَنْ كِلّ مضنَى

يا عُود يَا تَايه يَا مَيّاسْ

رِف بالطَّهَف والشمس وبنا

لان الطَّهَف لَي هَبّ نِسناس

ذِليل مِتواضِع مِثِلْنَا

والشَّمس لَي يَتْ عَالي الرَاسْ

قَالَتْ يا مِخجِلنا اسمَح لنا

لا عَاشْ واشي الحُبْ يَا نَاسْ

لَي يِعتِني مِنْ دون معنى

مَرّ اللمى مِنْ كاس الالعاس

عَنْ كَاسْ بنت العِنَب أهنَا

والموت لَي بِهْ تْخَمد الانفاس

أهْوَن مِنْ صدودك يَا مضنى