يا منادى نادِي وقول: يا حلم
يا للِي تايه والا ضايع والا في الغفلة أنسرق؟!
تكونش شَاردْ مِ المرار.
والا زمان لحلام مَرَق؟!
فيض الوِدادْ فَرْهَدْ من الزَمْته اتحَرَقْ!
طالت علينا غُربِتَك..
والوقت بِينَّاَ أهوه فَرَقْ
فينك وفين الأمنيات؟!
حنضيع كده فى المفترق؟!
يا هل ترَّىَ..
لسَّاك وعايش؟
لِسه فيك شىء ينْقرَّا؟!
والا فْ مهب الرِّيحْ هويت
حرفك يجَرَحْ فْ اللي جنبُه
ولا عاد لا طب ولا دوَىّ؟!
والا تكونش خلاص يا حلم
ما بقيتش منا وبيعتنا؟!
مَ إحنا اللي ف الكادِر وقفنا
أصنام لا نسمع لا نرىَ!
سنين تعدِي كلها
لقطات تباهي ومنظرا
قال المنادِى: شوفتي خيبة ما جَرَى؟!
رُوحت وسألت فْ حَيِّينَا
قالوا ما فيش حِلْمْ إلا دَه!
طَرْطَشْ بدَمُه.. طَاشْ وطَاشْ
دَلْدَقْ علينا كلنا
سَرْسِبْ إيدينا من أيدينا
وبعضنا من بعضنا!
بُقَعْ الدِما
بَصَمِتْ على توب الفرح
العُرسْ شَطَبْ والعريس
في تابوتُه مَدِدْ وإنطرح!
خرَسْ الكلام
وزن وقوافي حِلْمِنا
طابور طويل ما فهوش عزا
ولا حَدْ.. يَاخُدْ خُطْرنَا
سعيِكم مشكور خلاص..
مع السلامة يا حلمنا
إقفل يا ريس مسرحك
خلِّي الستارة تِنسَّدِل
عَ اللِي باقي لنا مِننا!