يامرحبابك عد ماي المحيطات
يامن تكلم بالكلام المفيدي
واللي يراسلنا تجيه الجوابات
بالفاكس والاعن طريق البريدي
أنا تفرحني علومك إلى جات
أقولها من جد والله شهدي
ياللي شكى من بعد الأحباب بالذات
ربك يسويها على ماتريدي
وتشوفهم بعد التعب والمعانات
ويصير بعد الهم قلبك سعيدي
تقدر تصل للي تريده ولو فات
والعلم مايحتاج جهد جهيدي
أنا الذي لاعاش حبي ولامات
وحالي بعد فرقى وليفي زهيدي
شوفت حبايبنا من المستحيلات
وقلبي على النيران يوقد وقيدي
ماعاد شفناهم ولو فالمنامات
والحظ عاثر ماتجمل ولاايدي
بعد الصداقه بيننا والعلاقات
أقفوا وخلوني لحالي وحيدي
صرت أجنبي عنهم وكنا قرابات
وهذي خلاصة حبنا والحصيدي