يا مدمزيل ياللي ف قصرك يا زينه عصرك
المبسط يحبك على خصرك يتهز قوام
في الحرب بتواسي المجاريح فوق الطراريح
وتقلبي الغم بتفريح والنار بغرام
ومشيتك في السكة غزال وقيافتك عال
كدا سلت ملت مفيش خلخال وسخام لطام
ولا الإيدين فيها غوايش ولا شيء حايش
كدا لهط مهط فطير بايش اشمط وأنام
اللحم ابيض ومزقلط وبيتزفلط
والوش ده مش متخطط زي ام لتام
دول في المدارس ودوكي بيربوكي
الله يخليكي لأبوكي وامك ياتمام
طلعتي حافضه جغرافيا وصحه وعافيه
حتى اللي هوه بلا قافيه حافضاه يا سلام
البنت عضو في اكاديميا وتعرف كيميا
خلينا احنا في الباميا والفقر التام
تمسك يا عم ايد التلفون مش ايد الهون
اللي تسمّع في الكركون والناس ح تنام
فين اللي تعتر في الحلّه وتكسر قلّه
من اللي تنقش دانتيلّه من البفته الخام
مفروده دايما لاتبوز ولا تتأوز
عازبه ولما بتجّوز تعمل له مقام
يبوسها قدام جمعيه وتبوس هيه
لا كسكسه في الحرية مسيو ومدام
مادام يحبها وتحبه وداخله ف عبه
مايسبهاشي ولا بتسبه من عنده كلام
اما الا نيته أم جلاجل تاخد الراجل
تركبه الفقر العاجل وتجيب له لجام
متجوزاه وعاملاه سلم لو يتكلم
الضرب على صدغه يعلم اكفف وأقلام
تدخل وتخرج ما تشاور عايزه أساور
ما تخلي شرطي ولا مجاور ولا واد خدام
عليها حته دين عرقوب ولسان مسحوب
وصدغ أطول م المركوب وتياب قُدام
وجوزها يشرب بنوره وهيه طاطوره
تحبل وتولد بالطوره زي الأغنام
ييجوا العيال اللي يهرهر واللي يبربر
ودا اللي اقرع واللي اعور واللي له خزام
أطفال أوربا ف عربيات ومربيات
وبزازات وتبات ونبات ولهم حمام
لا ده أبوه مليارد كبير ولا دا ابن فقير
مادام دا يبقى طفل صغير تعذيبه حرام
قال الكرم خد أموالنا امال مالنا
يا رب سايبين أطفالنا زي الأيتام
مكومين كدا في الشارع روس وكوارع
والسلسلة وعضم الذارع والباقي عضام
تدوسهم السادة الشماليل يعني المساطيل
المجعوصين جوا الطومبيل زي الأصنام
آه لما أشوف رزق الجاهل كدا بالساهل
صاحب وجاهه دا بيستاهل حكم الإعدام