تولد الحكمة الكُبرى من التجربة
من غريب الكلام اللي زمن: مختبي
قلت والشِّعر ما جاني كذا موهبة:
الحزن قد نزع بالكاد دمعة نَبي
أيه يالأرض يومي كان ذي مسغبة
يوم هزّيت نصف الحيرة بمنكبي
تشهق الريح في الشباك وتعذّبه
قلت من شكّي المبني: إذن بسببي!
ياوطن من خذا صبره على مقربه
من يقينه خذا شَكّه على ما يبي!
يوم ليلك هوى من نظرتي كوكبه
عاد مرّك صباح المنتظر، مُر بي..
وشهو الشِّعر لولا غفلة المنتبه؟
وشهو الصمت لولا كلمة تختبي
والغبي يوم مَرّ الكلمة المُرعبة:
قال: أغبى قصيدة، قلت: تبقى غبي!
ماقراني سوى من هزّ لي منكبه
وراح يبحث عن النسيان بين كْتْبِي!
وقارئ فتّش بأبياتي المُتعبة
عن بقايا تعب راحة، لقاه تْعَبي!
وقارئ غازل أحلامي وأنا أرتبه
وبعثر سنيني الحلوة على مكتبي
قلت: يا بارد أوراقي بقى تجربة
اسكن مْن الشتا، بعد الشتا ف حْطبي!