دنياك ما تسوى العتب والمشاريه
حبل التواصل يا أبيض الوجه مدّه
والكفو لو يبدي الجفاء لا تقاضيه
لابد ما الطيب طبوعه تردّه
والعاقل يسيّس لبيته ويبنيه
والجاهل البيت المعمّر يهدّه
والجرح لو ما جاء حكيمٍ يداويه
يظل ياكل داخل الجسم مدّه
والوعد مثل الفرض واجب توفيه
دقّ الصدر خلّه إذا ما أنت قدّه
وأن شفت خايب فالحذر لا تماشيه
عن سكته جنّب ومرّ وتعدّه
والسرّ بين الناس محذور تفشيه
من يفشي أسرار البشر لا تعدّه