ياالرفيع الشريف اللذي مايقدر مقامك وضيع
ياصحيح البدن لبسوه الكفن مثل بشت الزفاف
كنت بين الرجا والامل لكن الحض عيا يطيع
يثمر الحلم لكنه يموت الثمر فا السنين العجاف
خابرك يابحر تستفز المواني وبطنك وسيع
مادخل لجتك يابحر سابح الا يروم الكفاف
للكواكيب دري دليل المسافر قبل لايضيع
مثل هادي دليل اللبيب اللذي لجل يامن يخاف
حسب منهو تفكر بهذا الفضاء يدري انه نجيع
بارض ولا سمى كل نامي نمى ياصل اخر مطاف
كل صانع ترى قدرته واضحه بينه فالصنيع
هذي الارض منهو لها يرسل المزن بعد الجفاف
اترك الملحدين الذين ادعو بالكلام الشنيع
غرهم جارهم واتباع الهوى مثل شرب الزعاف
الله الي كفل لقمة الشايب الكهل مثل الرضيع
والوحش والدبا والطيور التي سبحت له صواف
من عصاه وكفر نعمته ماله الا صديد وضريع
واللذي يرتجي رحمته والهدى والرضا له قطاف
والحياه ابتلاء وفتن والعمر ينقضي بك سريع
والقبر فتنته لاافترشت الثرى والثرى لك لحاف
والفتن والبلا والمحن هي محك التقي المطيع
والعسر له يسر والجزع يظهر اهل النفوس الضعاف