ايه اللى غاصبنى ياعم الحاج
اعيش مع واحده عقلها هج
واحساسها كله بتخطيط
تاكل، تشرب، تصحى، تنام
كلة لفين، ومنين، وبكام
وانا عمرى ماكان قلبى حويط
امبارح بتقشر كوسه
قلت لها ياطعمه ياننوسه
البيت فاضى وعايز بوسه
ترد تقول هو انت عبيط
بوسة ايه يابو بوسه اتنيًل
اصبر لما الدنيا تليًل
حملك مش سهل ولا قليًل
اهمد بقى وبلاش تنطيط
انا مش بوستك من سنتين
بعد ما ابوك مات له بشهرين
بأمارة وكان يوم اتنين
انت... ده انت يالهوى غويط
قلت لها ياوليه القلب
مهما يشيل ويشوف م الغلب
عمره ف لحظه ما ينسى الحب
مهما حياته تكون لخابيط
حبك بقى فالصو بقى صورى
واقف زى اللقمه ف زورى
شرطه عليّا احبك فورى
وحبك ليا يكون تقسيط