وزعوا...
وخا حرام لوزيعا
جروا ودفعوا...
وتقول خاصانا غير دفيعا
جيعونا وشبعوا...
حيث خيفانين من الضيعا
نشبونا وقلعوا...
قالوا الراس بلا نشوة خاصو لقطيعا
فالليل لبهيم موكا تبحصص
والخوافة ما يشوفو موكا
ترقد فعين الشمس وعلى النعمة تتلصص
تحضي بياعين الشمة والشوكة
عيبنا لي هو فينا
مول لبغل هو لي يعس
ولكلمة لحلوة الزوينة
ولكلمة مقسومة فالنص
نصها مضبوع...ونصها مرجوع...
ونص بقى بين الضلوع
مكبر لغبينة
كلمة شبعت حتى متخومة
وكلمة مقجوجة ملجومة
ايلا خرجات تولي تهتريف... تولي مسمومة
الفيش والزواق ودواخلنا مهزومة
نعلقوا ونعلقوا والكلمة مقسومة
التمكريه...
والتمكريه فيه ما فيه
معولم ومقولب...
ضربة فالراس والحريق فالعرقوب
والراس مكره مسلوب...
مسيح...مشيخ...مجدوب
الجنازة حامية والميت كلمة
كلشي رافد فيها حسيفة
ولكلمة مساعفة بهمة
حيث ما كتخسرش السيفة