بين الأهل و البيت ما عدّت السور
و استقبلت دعوة زياره و حارت
تزور ؟ و الا تعتذر ؟ والعذر زور
لين اقبل اليوم المحدد و زارت
طلّت على الجمهور هاله من النور
و بلحظة كل الرقاب استدارت
طارت لها عصفور من بعد عصفور
قلوبهم مثل العصافير طارت
و بقلبها عش الرضا كان محظور
به زيّدت حسرة قلوب تبارت
آية من الطيبة و لا تعرف الجور
لكنها من وفرة الزين جارت
تجلس و من وجناتها سحر منثور
والله يستر لين قامت وسارت
حورية يخضع لها كل مغرور
و اقوى رجل لا مرّت قواه خارت
لفّت على جمع الأنيقات بالدور
ما فيه وحده ما تأذت و غارت
من قبلها غيد الحفل باقة زهور
من بعدها كل البساتين بارت
نسمة ربيع و منها هاجت بحور
شلون صارت ؟! معجزه؟ بس صارت
راحوا سببها من كسيره و مأسور
فجأه !! عن عيون الضحايا توارت
من يومها أصدر أمر صاحب الشور
تُرفع على الباب الرئيسي عبارة :
يُمنع دخول الآنسه شيخة الحور
من شرفّت كن البراكين ثارت