كنا ... ب بيوت شعبية
مليانه حب وحنية
إبيوت ماهي كبيرة
لكن بالراحة ممليه
اكبرها اللي بحوشه نخله
والا اللي بحوشه عبريه
يازين الجلسه بظلاله
بالصيف بتال العصرية
لامنك فليت بساطك
وجاب اخوك الزمزميه
واختك جابت ماء بارد
ومعها تميرات مدحيه
واول مايذان للمغرب
نركض للمسجد رجليه
منازلنا كانت شرحه
بسمنت وطوب مبنيه
وجدرانه مصبوغه بويه
وسقفه اخشاب بحريه
بغرفها معلّق مراوح
وبالحوش محلا القعادية
نجلس جميع ونسولف
وناكل من نفس الصفرية
ونشلق جرو ٍ وجحيحه
من سوق الخضره مشريه
ومحظوظ راع الكنديشن
اللي تسمى صحراويه
وان جانا ضيف نهلي به
ماندري به قبل الجيه
نستانس لامنه جانا
مرحب فيه ويالله حيه
واذا خلصنا من السمرة
نرقى للطايه الفوقيه
ونلقى المطارح مصفوفه
مفروشه في وسط طويه
تنام الاخت بجنب اخته
والولد في جنب اخيّه
وان طالت علينا السهرة
نرقد من فوق الزوليه
وجيران يالله من فضلك
كرم ونفوس وفيه
مانفرقهم عن اهلنا
جيران بنفوس حيّه
كنا نعرف كل الحارة
وكل ٍ يرافق خويه
ونركب جميع ٍ بالموتر
عند الروحه والاالجيه
كنا فعلا عيله وحده
فينا فزعات وحميه
هذي هي حالتنا منول
ذي .. عيشتنا الاوليه
عواايل مسكونه طيبه
تسكن ببيوت شعبيه
احمد الناصر الأحمد
احمد الناصر