ياللى إنت شارب مر عشتك للكيعان
ياللى إنت تابع للى بايع للجيران
إنت يا واد مخنوق ومش عارف تعيش
دايما مطاطى.. ياما قلت لك قوم وما تطاطيش
خلاص مبسوط؟ أهى إتباعت تيران
مسخوطكم أهو ملعون ذليل تابع إيران
لساك يا واد بتهتف علو صوتك للزعيم
لساك وسخ ندل أجير.. لساك غشيم
اشرب بقى
ادخل يا شعب وخش جوا الشرنقة
إوعاك تفوق
إوعاك تحاول مره تجنح للشروق
ياللى إنت حابب كل مره تتغلب
سلمت روحك كل مره منقلب
كل العساكر يخدعوك
لجل حمايتك بيهينوك
ولو مش مصدق
اقرأ التاريخ جوا الكتب
ياللى إنت مش عارف تكون أى حد
ياللى إنت عابد ع الدوام أى صنم
ياللى إنت واحد من قطيع اسمه الغنم
إوعى تفكر يوم تكون إنسان كريم
أو مره عقلك يخدعك وتقول كلام
أو مره تهتف بالخطأ ضد النظام
بص سوريا
بص ليبيا
بص اليمن
بص العراق
بص اللى باعوا ف يوم تيران
إوعى تفتكر إنك ف يوم إنسان
فهمت قصدى يا بجم
قوم بينا نسجد للصنم