يامرايتي ماعاد اشوف الذي كآن
طفلٍ يشاور نظرتك في عقاله
وتعطينه البسمه على كف هيمان
وان راح .. مستانس ومرتاح باله
واليوم لا يامرايتي مالك ألوان
وان جيت لك احس باحساس عاله
ما اشوف غير اللي مَلَت عينه احزان
كنك تقولي حالتك مو بحاله
شاب الحزن والدمع خطرٍ إذا بان
والهم يكتبني قصيد ومقاله
يامرايتي يالواقع وصدق الاعيان
جيتك بعد ماكنت سالي وداله
جيتك ادور فيك بعيوني لسان
واشوف مايسهل عليّ إحتماله
وقالت لي الصوره .. ترى العمر ريحان
مايدوم وافهم ماحوته الرساله
يامرايتي رديني مثل اول انسان
ماهمته دنياه ويعشق لياله
وان كان ماجبتي لي الفرح الآن
اللي قبالي .. حطي واحد بداله