مرت سنة وآنا أعاني تمرد
ألقاك ود وقلبك يشوفني صد
غرّك صفا قلبي وظنك تفردك
أجْمعك أنا وانته مثل شوكة الورد
غيري يشمك يوم أنا أجمع توددك
لا فادني قربي ولا فادني عهْد
لا غبت عنك ألقاك والبعد يجهدك
تبكي عليّ افحضن غيري من البعد
ما حس فيك الحين مابي قصايدك
مسافة إحساسي معك دونها حد
أبغي أتطهر منك والثم توردك
حمرة خجل أودم ما يفرق القصدْ
أغليك وأنزف جرح لا جيت أعاندك
بس الحقيقة ضد يحتاج له ضد
يا شاعري مصلوب قلبي فمعبدكْ
أموت وانته ما تصلي من الفقد
تبكي بعيد... وبس همك تخدّدك
تشكيني لروحك وهي ذنبها يهدْ
يا ساكنة شباك فجدار عيني
متى يشوف النور شباك الأحلام
شعري عيونك وانكساري حنيني
وغيابك إحساسي بخيبات الأيام
تصدقيني عاد بينك وبيني
حنا غدينا أغراب عن بعْضْ من عام... !
ساعة سألتيني متى تحتويني
حضنت حزني قبل ما تجف الأقلام
ما يكفي اللي فيك يجتاح فيني
أبكي عليك ومنك واشتاقك الهام
تقارنيني فيه تب تجرحيني... ؟!
ما عاد يبقى جرح يشتاقك خصام
مات الأمل عندي مثل ما تبيني
ميت قريب ومبتعد صدقه أوهام
أبغى أدفن الذكرى قبل تدفنيني
آنا وكل اللى مضى شهوة أحلام