اشربيني شمس في لحظة غروب
واسكبيني توت بيدين التعب
عن غرامك والله اني ما أتوب
لو يتوب عن الذهب مي الذهب
مال خصرك واعتدل يوم الهبوب
تستبيحين واركي ضلوعي حطب
انهدم سقف المكابر طوب طوب
يوم قلبي من لمى نهرك شرب
الضما فيني بلاد بلا شعوب
يا شفاتك كاسرة ثلج بلهب
آه لو تدرين وش معنى اذوب
مثل شمع ويصفعني كف المهب
كان جيتي مثل غيمة من قلوب
تمطر بكحل اشتياقك للهدب
من قميص البدر لبست الدروب
وجيت تايه غير طيفك ما كسب
دمع شعري من على المحجر يروب
وانتِ .. انتِ حلوه لحد العجب
من غيابك قلّب الجمر الجنوب
وفوق كل ورده من الروض انكتب
تمطر اوراق القصايد على الدروب
والسما نامت على غيمة تعب