فراق شمل أهل القلوب المواليف
وكل على رأسه يباري ظعونه
يتلون مشهاة الابكار المشاعيف
وكل يبي قفره قدم يسهجونه
والعشب تلوي به أشعوف من الهيف
والراعي أخلف شربته من أسعونه
وكل نصى القرية يدير التصاريف
واللي له أحباب لباب يجونه
وتسعين ليله جانب العد ما عيف
ولا للشديد مطري يذكرونه
وجاهم من القبلة ركيب مواجيف
وحضور يوم ان النخيل يصرمونه
والعصر بالمجلس مضال وتوافيف
وأمسوا وتالي رأيهم يقطعونه
الله لا يسقي ليال الشفاشيف
أيام راعي السمن يوفي ديونه
وليا نشد عن واحد قيل ماشيف
ازروا هل القعدان لا يذكرونه
الشيخ كنه صايل يتبع الريف
يأخذ أسبوع البيت ما يبتنونه
سقوى إلى جت نقضة الجز بالصيف
وابعد ثرى نقعه وكنت مزونه
وجتنا جرايرهم تدق المشاريف
البيت يبنى والظعن يقهرونه
وتقاطروا مثل الحرار المقاييف
وراعي الغنم عن مرحهم يفهقونه
وتواردوا عد شرابه قراريف
العد لو هو بالفضا يشحنونه
وهبت ذعاذيع الوسوم المهاريف
وسهيل يبدا مابدا الصبح دونه