شعر مشاعل الشوق أم فيصل
الله ولا خوة عديمين الأخلاق
الي مصالحهم تجي فالصدارة
إن قلت لي مذهب على الطيب ينساق
زادوا تطفلهم وزادوا عياره
خطواتهم بالشر عجلات وسباق
وان جاء مجال الطيب مامن شطاره
وان زدت بالمعروف زادوني إحراق
وأنا لحبل الوصل ما أبغى دماره
نجمي مع أهل الطيب ساطع وبراق
يوم الردي نجمه غدى عن مساره
شمس الردي تبطي ولا جالها إشراق
واذى الردي يلحق ولو هو بداره
يالله يالي للمخاليق رٌزاق
تبعد طريقي عن رفيق الخسارة
شعر سلطان عتيق الحربي
عز الله اشهد يا مشاعل بالأفاق
نجمك سطع بالطيب عز وإمارة
وأهل الردى دايم على الطاق طرباق
الطق ما يخطي وجيه القشارة
شهب الوجيه اللي على كذب ونفاق
لا شيمةٍ فيهم ولابه نعاره
كل فعل بيّن.. بالوجيه وبالأحداق
يعكس على راعيه ابلغ شعاره
ملا يعز الروح لذل تواق
وإبليس ما يخفا ولو بالعبارة
وانتي عزيزة نفس من ساس الأعماق
ما غرنا بالطيب لابس خماره
لو المشاعر والأحاسيس تشتاق
عقلك على قلبك مصدر قراره
والنعم.. يا بلغ من نقا بيض الأوراق
وانقا وانزه من عفاف الطهارة