تشوشت.. شاشات.. فكري وجاشي
همٍ تشاويته وهمٍ علي هاش
وتوَشّ وشتْ بي.. شايبات الغواشي
تبي.. تبيّتْني بلا لحاف وفراش
وقتٍ لك الله صابني بإندهاشي
لاجار كنّ يخرّق القلب رشاش
يا علْ يسقِي قبر أبويه رشاشي
اللي شقى في دنيته كود نعتاش
ويغفر له الزلات منشي النواشي
وأمٌ.. تولتنا رجاجيل واغواش
دنياً دنية أودعتنا طشاشي!!
بيني وبين أخواني اليوم مطراش؟!
خالد للندن زهبو له فراشي
يفداه غالي المال والحال واللاش
ما هوب للدنيا وزود المعاشي
يخدم وطنه اليوم لو كان ببلاش
درس متون الكتب وصم الحواشي
في العلم له باعٍ وفي الحق بطاش
خالد طليق الوجه زين المماشي
ما عيبَه من هو للأعراض نباش
ماهوب توه في المواجيب ناشي
خالد.. تخلّد فعل يمناه بالجاش
لا شفت رقمه صاب قلبي ارتعاشي!!
ولا طرّو أسمه قيل: عاش الفتى..عاش
يارب سهل كل دربٍ عتاشي
وأحفظه من ميلات بقعا والأوباش
وما يسعد المشتاق حكي ونقاشي
ياليت من يدفع على شوفته كاش
عمري وما أملك تراها بلاشي
افدي بها اخواني ولا نيب بكاش