احد(ن) غيابه مايثير الأماني
يمكن تمر اسنين ماجبت طاريه
واحد(ن)يغيب ومن فراقه تعاني
في غيبته تسهرعيونك وتبكيه
في غيبته تذبحك حتى الثواني
تجهز على قلبٍ يحبه ويغليه
الصبر ماله في غيابه معاني
ودي معاه امسك يمينه واباريه
جمرة غلاه الي سناها كواني
تعظمة في داخل الصدر تكويه
ضلت تسامرني وانا منها اعاني
حتى تحجر جمرها واللهب فيه
يوم انطفت حولتها شكل ثاني
الماسة ٍ تزها على جيد غاليه
اغليت ناره لوبناره رماني
ناره ولاجنة مكان ٍ يجافيه