هي ناعسة من طبعها ما بها حيل
لا تكحلين العين يثقل هدبها
خفي عليها ليتها تسهر الليل
طال السهر والنوم كنه غلبها
لي من هدبها ذكريات ومراسيل
في ضحكها في مزحها في عتبها
تبنى من جروح المواعيد وتشيل
هي الجروح اللى تجى من سببها
لو أن غيبتها مثل غيبة سهيل
لا الجدي مرضيها ولا احد عجبها
تغضي وكن رموشها تجمع الخيل
وتنظر وكن البرق يقرأ نسبها
لا سلهمت ما لى للسوالف تفاصيل
والمشكلة لا بينت لك غضبها
لا ناظرتهم من زعل بالمظاليل
كل المجالس صمتها صار ادبها
هي ناعسة من طبعها ما بها حيل
لا تكحلين العين يثقل هدبها