عقدٍ من اللولو وعقدٍ من الماس
وعقدٍ على نحر القوافي بريقه
الشعر فيض احساس من واقع الناس
أكبر مهماته وصول الحقيقه
ياللي تظن الشعر كتبٍ بقرطاس
وهمٍ على غر المذابح وثيقه
الشعر فيض أحداث وشعور واحساس
على السراير والبصاير مويقه
مرٍ تصرم معضلاته من الراس
ومرٍ يسوقه هم وقتٍ وضيقه
مرٍ مثيراته تعود بالافلاس
ومر يفيض وتختفي ما تطيقه
ما هوب وقفٍ للتسلي والاوناس
مفتاح بيبان القفول الغليقه
يثير شجعانٍ على قب الافراس
لا طار ستر العاشقه والشقيقه
ويثير مشغوفٍ على الدرع والطاس
دون الحلال ودون حرمة فريقه
فيه اختلاف اشكال وهموم وجناس
كم واحدٍ من همها جف ريقه
تشوف به عز ومعزه ونوماس
ودربٍ يضيق وينتهي في مضيقه
وكم واحدٍ عَزه وجاره من الباس
وكم واحدٍ حطه بقبضة دريقه