لا تحاصر الظلما ولا تسجن أشياك

لا تحاصر الظلما ولا تسجن أشياك،

ولا تنغلق بين السكوت وسؤالك،

البارحة والصمت يسكن شفاياك،

كل شي تحرّك وأْنت واقف لحالك،

كنت أقترف صمتك بلا وعي وإدراك،

ويثور صوتك داخلي، “هَدّ بالك”،

أكتب وأقول الناس بكرة ب تقراك،

وألقاك وحدك كنّ محدٍ قرالك،

طفلٍ تهجّا ضحكة أمّه وخلّاك:

وجه إنخطف بين التجاعيد حالِك،

تعال باقي لي معك حلم غناّك،

تعال علمني بعد كيف حالك؟

انا فقدتك صورة / وصوتك أحياك،

وأمطر جنوبك لين سيّل شمالك،

تعااال تكفى ما بقى من بقاياك،

الا انت وحدك متّقي في كمالك،

ياخي هلا يا مرحبا عد ممشاك،

اقلط تصدّر صدري و جِبْ وصالك،