وكان ف القصه حدايه
وتور ووورده وجبان
قلوب للصبح سهرانه
وكلمه من زمن طيب
وحضن م اللي بيطيب
وشكوي تحرك القدره
تهز ببان
ويعوي الكلب ف الشارع
علي معزه بريئه بتراقبه
نهش الليل برائتها
ونام خجلان
وعاشت الفكره من ادم
رجوعك يعني راح تدفع
وتزعل قد ماتزعل
هتاكل من عرق يدك
وموسي يتحرم كنعان
معادش امان
علي ظهر الزمن أيه
تشفع ف اللي راح يسمع
صراخك هو مجهودك
وجودك ليه بدل السبب شيله
عيله تضم وتطبطب
وقلب يشددك تهدا
ويفرد ف الشقا عودك
ولينا ميعاد هنلاقي
مهما هيبقي الف غياب
مفيش كداب يقول اختار
وروحه مسلمه للغيب
معادش العيب له اصحاب
علي قيد الحياه اسرار
اولها
انا منك
سقيتي العمر قام طارح
وغبتي
تغيبي ليه؟
سبتي النبت للضله
تسقع فيه
واخرها انا منك
سيبيني اسرح
يجوز الحلم مره
تجوز الرحمه بالاحلام
سيبيني اعشق
يا عاشقه القلب بالايمان
بهت قلبي
تعالي ضميني
عيدي المعني للالوان
عيدي الصبح لشروقي
قتلني الليل ف بعادك
وكان ياما كان...