تنام عرعر وانا مانمت في عرعر
والعين مابين تغميضه وتفويقه
مافيه صاحب لنص الليل يا بندر
مليت لم الحزن وحدي وتفريقه
يا بندر الشمري ديرتك مو شمّر
ديرتك من شكّلتك الماء وإبريقه
ريقي نشف .. وانت تتريق وتتمسخر
وصاحبي لا نشف ريجي نشف ريجه
لا تفتح الدفتر .. الله يلعن الدفتر
إن كنت صاحبك ساعدني بتشقيقه
أنا اكتب الشعر حتى انبت ورق أخضر
ولا انتظر من يد الجمهور تصفيقة
الشعر دمعة تطيح وصحن يتكسر
من أضيق الوسع حتى أوس الضيقة
لنا الشوارع لنا المسمار والبنشر
في كل شارع لنا حكة وتلبيقة
شبعان دنيا ومتبهذل ومتجرجر
محلوق راسي وماكل كفّ تحليقة
هابق مع الحزن وادشر وين مايدشر
الحزن هابق ويبغى ناس هبّيقة
أبغى من الوقت: وقتي ماطلبت أكثر
ومن جناح البكا خفقة وتحليقة
يتغيّر الناس وأنا ما اعرف اتغيّر
مابدّل الطفل زحليقة بزحليقة
ما خاف تحقيق حلمي يوم يتأخر
أخاف حلمي يموت بيوم تحقيقه