ياراكب اللي يوم تسمع وشيشه
وشيش رقطاً ذيلها بالعصاء نيش
قامت تحك جنوبهامستهيشة
وتبين أنيابٍ سوات المناقيش
يمرج مع البيدا إمراج الخريشة
إلى أمرجت بين الوحش والنواحيش
من عقب ماهي للمنايا وليشة
بين الصقور ومبهمات النواتيش
حيت حياة اللي بتالي الحشيشة
عقب الدرك شرب القراح النقاريش
جمسٍ يربح كل من حط شيشة
يتعب بتعبيته طوال الخراطيش
إلى وقف يكوي الكبود الغشيشة
وإلى مشى ما يلحقه مومي الريش
برقٍ من العارض جذبني رعيشه
يوم يتلالابالمزون المراهيش
وأثره ما يسقي الكبودالعطيشة
يبرق ويرعد ميرمدري على ويش
لا تحتزم باللي ضلوعه هشيشة
اللي ليا سمع النداء صد تطنيش
لاتحتزم به لو تحيزم بخيشة
ما يقطع الدِيان ركض الأكاديش
وبيتٍ بليا ساس مثل العريشة
يطيح لولمع ببويه وورنيش
وجرد السهال الخاليات الوحيشة
اللي تطوى في شجرها الحنافيش
أخير من ضله وبعض المعيشة
يعافها الطيب ويفرح بها الديش
وقال المثل مامن ورى طلع بيشه
عيشة وراس الضبي ما به عراميش