حسبت الزمن وافي واثاري الزمن خداع
ينقّض لك جروحٍ قديمه ويحييها
أنا كيف اطمّن خاطرٍ في فؤادي ماع
من الفقد كبدي صالي الهمّ شاويها
تناهيد حزنٍ تجّتلد في حشايا انواع
تدكّ الضلوع وثومة القلب تفريها
بفقد الوفي راعِ المراجل طويل الباع
(ابوهاني) اللي سيرته نفتخر فيها
بوصل الرّحم..والبرّ..والجود ذكره شاع
سجاياه ياصعب الذي بي يحاليها
حبيبٍ.. لبيبٍ.. لينٍ..وافيٍ مطواع
شجرة الوصل حرصٍ عليها يرّويها
نعيناك يا(حلوان) من خافقٍ ملتاع
وبكيناك لين العين نشّتْ مجاريها
وغرسٍ غرسته في قلوب البشر ماضاع
سيرتك تَرويها العوارف وتحكيها
فيالله انا طالبْك يا المعطي المنّاع
تجعله في جنات عدنٍ بعاليها
وبكم ياخوالي نفتخر والصدور وساع
مواجيبكم في الطيب محدٍ يجاريها
ومن لا تأدب من زمانه يبي ينْصاع
تطوّعه بقعى لين غصبٍ يماشيها
دنياً تقلب من تفكر بها يرتاع
عقول العوارف فاهمه وش تواليها
تشوف المصايب رثعٍ والقبور جياع
وسهوم المنايا ماتبي من يقدّيها
وازكى صلاةٍ عِدْ ما ذعذعت في قاع
هبوبٍ على محمد شفيعه وهاديها