هذا أنا ما بين حزني وخوفي
تشفّ ما دامك تحب التشفّي
حاولت أطوّف غلطةٍ ما تطوفي
لكن رمتني للسوي والمصفّي
ما تستحق ارض الصداقة .. قنوفي
لا صار ناتجها لنا ما يوفّي
عليك يا من فيك ضاع مْعروفي
عذرك بعيني مثل طرد المقفّي
شف صفحتك عيّت تعانق حروفي
وأصبحت لا ضدي ولا أنته بصفّي
يا حرّ جوفي منك يا حرّ جوفي
عدو في ثوب الصديق مْتخفّي
حتى ولو قلت الخطا من ظروفي
بقول لك روّح وهذي تكفّي
خل الثقيلة دون شرهة كتوفي
لا مات في وجهي عليك التحفّي
هذي هي أطلالك وهذا وقوفي
حتى عن مْصافحْك شيّمت كفّي
وأكبر دليل إنه سمح منك شوفي
هذا أنت حي ومْعتبرْك مْتوفّي