مشاعري لي ثلاث شهور مكبوته
ادله النفس مير الله معذبها
وين انت ياللي يفز القلب من صوته
غيبتك طالت ولا ادري عن سبايبها
محبتك في جدار القلب منحوته
صيور الايام ما يخفي مضاربها
عزلتني عن سمية كل منعوته
الي حمار الشفق يشبه ترايبها
واسقيتني من شراب الورد والتوته
لكن الاقدار ما تصفي مشاربها
يلمح عبور السنين الي دنا موته
ما يعرف شعورها الا من يحسبها
عاف الحزين الكلام وطوّل سكوته
يرقب حرى جيةٍ ما بان غايبها
ابني رواق الرجا واشرع بيوته
وادفع ثمن غلطتي واعرف عواقبها
والفرحه الي من الاحباط مبهوته
حسيت فيها ولا داويت صايبها
فرحة غريبٍ رجع في وسط تابوته
امه تهل العباير من مصايبها
ترقب مجيه لها عامين مزنوته
من شوقها ما تجمع مع قرايبها
والي بقى عبرةٍ حره ومفلوته
ترخي رموش العيون اول سكايبها
والحال عشبٍ شواه القيض وكحوته
في كنةٍ يصرم العيدان لاهبها
تكثح عليه اللهايب كل ساحوته
ما سرته زمةٍ فاحت مطايبها
حصيل الانسان دايم عمره يفوته
ما حس بالوجعه الا من يجربها
واللي يعيش الليالي حسب مشهوته
يفوز في لذةٍ ما احدٍ يفوز بها
ذلول الاحلام مطيوره ومنعوته
مخليٍ حبلها من فوق غاربها