حنى بني وايل إذا جيت الأنساب
تلقى لنا تاريخ ما صار قده
وحنى بني وايل لنا اسم ما غاب
من جدنا الواقف ل آدم نعده
ومن فضل ربي بالفعل نرهب إرهاب
مثل البحر لا هاج موجه ومده
ما يتعبه كثر التموج ولا شاب
وما بخرته الشمس غصبن ترده
إلين صرنا بالأراضي كما الناب
في فك سبعن تعجز فهود صده
لكن جعلنا الله للعدل أطناب
فاذا تراخا الحق نرجع نشده
وما فيه جيلن مرّنَا فيه غلاب
يوصل لنا إلا ومجده نهده
ونعلمه كيف الرجاجيل ترتاب
ثم نقصر حدوده على ما نحده
ويحسب لنا في كل ميقافن حساب
وكلن يشوف اللي إلينا يمده
نطيب للصاحب دبالات ما طاب
ولا العدو نلعن أبو جد جده
واللي يعادينا له الذل صباب
تاطا بطون أقدامنا فوق خده
والموقف اللي منْه راس الرجل شاب
اصغر ولد منا اذا حل سده
أقولها وياما قطفنا من أرقاب
جهال تاريخ السنين المصده
حنى بنا أول ملك بين الأعراب
وحنى مواريث الملوك الأشدة
وحنى عدو من كان للشر طلاب
وحنى الجيوش اللي لهم مستعده
وحنى الكرم وقت الكرم عنه إضراب
في وقت قل الزاد يشكي معده
ما ننطر الضيفان تاقف على الباب
منّا لهم مرسول للزاد يندَّه
ربعي وأنا من فعلهم كلّي إعجاب
ربعي وراسي لا فخر مين قده