عطره الشانيل للخافق منبه
منْه تصحى كل ذكرى له جميلة
واشعر بإحساس..مدري، بس أحبه
وقمت أدور لجل أشعر به وسيلة
واستدارت بالمدور ألف سبه
لين حصل هالمدور وش يبيله
فكره تفاجئ خفوقي ثم تشبه
وسهلة التنفيذ وللذكرى ثقيلة
وجبت عطره بالطلب من دار صبه
عطر أصلي نسبته ماهي قليلة
وأركب الموتر معي للشوق طبه
وقبل م شْعل في بواجيه الفتيلة
في ممرات المكيف قمت اصبه
لجل لا مر الهوى يمي يشيله
وكنت ازود رشتي لآخر مهبه
لجل اشمه مع طلوعي كل ليله
ومن اشمه تنفتح للفكر غبه
محتواها شعور خلٍ مع خليله
ثم شارك عطر ثوبي او غلب به
كنني جالس معه فتره طويلة
وتصبح الأوضاع والله مستتبه
من بعد ماهي من أشواقي عليلة
ويوصل التفكير بالأحرى ل لُبّه
لين إحساس الجوارح يعتلي له
موقفي لاما يوصَّف ما يشبه
ما يعرفه غير من سوا مثيله
والمشاعر تنتمي للي تحبه
وغيرها أفخر بمنهو انتمي له
وايلي حجري من سلالة منبه
وينتشي كل الفخر باسم القبيلة
ربعي الويلان يالغافل تنبه
كم معادي لا نوانا شاف ويله
راسه اللي قادحن به له نذبه
وقلبه اللي صمّله منّه نشيله
وارثين أمجاد من جده وأبّه
حاصدين فعولنا لا جات ميله
وابن وايل بالمراجل انكتب به
سامي الأفعال، معناز لدخيله
وموكب الأمجاد تدري من ركب به
من تجاهل قول هذي مستحيلة
وغيرنا محشوم عن قول المسبه
منهم رجالن يشيلون الثقيلة
وكاتب الأقدار هو ربي وربه
كلنا في كل يومن ننحني له