كنا زمان.. أفضل كتير من دا الزمان
كنا زمان.. يا ميت خسارة ع اللي كان
كنا زمان.. لو كان فرح.. تتهز له كل الحيطان
وان كان عزا.. تحزن قرايبه.. ويزعلوا كل الجيران
تتأجل الأفراح.. ونقطع من رداوينا اللسان
أما النهاردة يا عمنا.. شيء يستحي منه البيان
شارع تلاقي فيه فرح.. وف زقة منه فيه عزا
ناس حزنها حابس دموعها.. وقلبها مجروح
ناس تانية لابسة شفتشي.. ويا روح ما بعدك روح
تايهين في دنيا الهزهزة والدق ع العود والكمان
والقرن في ادين الولاد في الأولة
وسيوف تطوح في الهوى.. والسلسلة..
بتلف وتشخلل.. ولا تعبان في إيد البهلوان
تبطح.. تعور.. تنطفي كل الكهارب.. والبيوت
يملاها بعد الزغرتة.. تهديد.. وصوت
وعريسنا يحلف بالطلاق.. ما هي فايتة للندل الجبان
بقى ده زماااااااان
كنا زماااااان.. أفضل كتير من دا الزماااااااان
كنا زمان... نعرف خطاوي بعضنا...
... ولكل واحد مشيته
وكلامنا كان
عمك فلان.. قال نكته لفلان ضحّكه
نسّاه همومه وشدّته
والواد فلان.. صالح فلان.. وراح بارك له في شبكته
والشيخ فلان.. قال خطبة في الجامع.. عجب
خلانا نبكي كلنا من خطبته
أمّا النهاردة يا عمّنا
تاهت خطاوينا بنا
تهنا في بعض.. وكلّنا ضاعت ملامحنا..
وماتت بهجة النكتة على طرف اللسان
والضحكة دبلت وانزوت
واحتل مطرحها القلق.. والخوووووف..
... وكل واحد في ميدان
يفتي.. ويبدي فلسفة.. ويسبّ غيره بدون بيان
حتى الخطب.
مستنسخة.. ومهلهلة.. وملبّخة
بهتت معانيها..
فضت م الموعظة.. والجهل عشّش ع الحيطان
حتى بقينا نختلف في البسملة
والوقت ما بين الإقامة والأدان
بقى ده زماااااان؟؟؟!!!!...
كنا زماااان..
أفضل كتيييير من دا الزمااااان
كنا زمان...
... بنعيش في بيت واحد كبير
حيطانه مدهونة وفا.. وبركة وخير
وان جه قدر للجار.. أو ف مرة اتعذر
تلقى الكتير...
... من أهله وجيرانه شعر
ماهو أصله كان بينا عمّار..
وقلوبنا كات مليانه خير
تتمد في السرّ الإيدين
باللي عليه تقدر يا عين
وشوية وشوية.. كتير
مش مظهرة.. أو فشخرة
كله سلف.. ذمة.. ودين
لا كمبيالة ولا شيكات
يترد وقت الميسرة.. أكتر... كتييييير
لكن النهاردة ياعمنا!!!!..
مش عاوز أفتح جرحنا
يعني.. أقول؟؟
واللا اسكت أحسن... واحنا نفهم وحدنا
طيب أقول.. عن لبسنا
واللا الكلام اللي بقى سمعه بيحرق دمّنا
واللا الحديييت اللي دودد.. دود دود دودد..
ويزيد.. ويكتر..
ينسبك وهمه.. ويعمل مشكلة
واللا اللفندي اللي اتزنق.. وبإيده زوّد مزنقه
راح يشتري الشيء اللي مش عاوزه.. ويمضي في شيكات
وبعد ساعة م الشرا ياخده.. ويرجع يحرقه
شيء فوق خيال العقل.. مش قادر بعقلي أصدقه
واللا شبابنا اللي غرق في المظهرة والكجولة
لا صوم ولا.. يعرف صلا
يا دوووب.. يا دوووب
محمول.. وجينز.. وسلسلة
فافي.. وحليوة.. وجل في شعره.. ولابس أنسيال
يادي الفضايح يا رجال
مين اللي قال إن الحضارة مظهرة.. من غير دماغ شغال؟؟
وأصول عليها نرتكز.. وأدين عفية بعزمها تنقل جبال
وتهدّ صخر المستحيل.. تفسح لبكرة مجال
مش مهيصة.. أو بلطجة.. وأونطة.. واستهبال
بقى ده زمان
كنا زمان..
... أفضل كتير من دا الزمان