غبتي وأنا بعدك روحي تحتضر
ضاعت ملامح فرحتي يوم فرقاك
جفت ينابيع الغلا ومات الزهر
وما عاد أنا الضاحك الأولي ذاك
خذك الزمن عني يا مقسى القدر
ليته خذا باقي تفاصيلك وذكراك
قلبك غدى بالبعد أقسى من الحجر
مدري وش اللي عن وصالي أغناك
وحلمي معك قدام عيني انكسر
يا ليت ماشفت بطريقي جرة خطاك
ضنيت حبك سحاب وشوقك مطر
خابت ظنون اللي لروحه تمناك
الوقت راح مع حضرة جنابك هدر
وطالت مشاوير السهر قبل الإدراك
طعنتي وآنا اللي لك درع وظهر
وشلون اجازي منهو مثلك وشرواك
في ما مضى عونك ولاسرارك ستر
يرخص لك الغالي وقبل تطلبه جاك
عاذرك ولو كنت ما تملك عذر
يا ما ويا ما للوصل قد ترجاك
واليوم لو روحي من البعد تحتضر
ما عاد ابي من دنيتي غير فرقاك
بتوسد العزه ، وبتلحف بالصبر
كرامتي عندي واللي خلقنا تسواك