اذكر الله قبلما يجري القلم بسطوره
في بداية منطقي بسم الله الرحماني
يا وجودي يوم شفت الديرة المهجورة
ديرتي يا مقسم الآباء والجداني
بعدما كانت بخير وبالسكن معمورة
أصبحت قفرة مخيفة ما بها سكاني
والمزارع والمساكن كلها مدمورة
يوم أطالعها بعيني هيضت وجداني
كنها تشكي ومما صابها مقهوره
مثل منهو يشكي الحرمان والهجراني
ذكرتني يوم كانت بالثمر مثمورة
لابسه ثوب الجمال الأخضر الفتاني
يا حلاوة زينها وجبالها ممطورة
والطيور اسمع غناها بأعذب الألحاني
كنها بنتن عروس بزينها مغروره
من يراها تفتنه يغدي لها عشقاني
الشعر يعجز يوفي وصفها وبحوره
طول القيفان ولا قصر القيفاني
عاش فيها أباؤنا وأحوالهم مستورة
بالرجولة والكرم والعزّ والإيماني
والمراعي والمساقي بينهم مشطوره
والتكاتف والتعاون حسبة الأخواني
صيتهم وأفعالهم بين العرب مشهوره
ما حدٍ منهم وقف لفلان ضد فلاني
يالله أن تجعل جميع ذنوبهم مغفوره
يا جليل الملك يالواحد عظيم الشاني
واجب الشاعر بمكنونه يصيغ شعوره
وأنا قلت أبيات بأفكاري وصح لساني