ادورك من مده هلا فيك جيت منين

ادورك من مده هلا فيك جيت منين ،

هذا منزلك بين المعاليق ماشلته ..

تصبرت عنك في وعود الليالي لين ،

ذبحني غلاك وموعدي طال ماطلته ..

ابي اقول كل اللي على خاطري هالحين ،

وانا خابر اني بجرحك حيل لاقلته ..

قبل ياخذك ماكنت بالشوف تملى العين ،

وحتى كلامك لاسمعته تثاقلته ..

وبعد ماخذاك وغبت عني ولا ادري وين ،

كبرت بعيوني و الجفا ماتحملته ..

اثر قيمه اللي في يديك ان خسرت تبين ،

وهو قبل عندك في يديك وتجاهلته ..

احبك كثر ماكنت سالي مع السالين ،

كثر مابكاني دمع عينك وهملته ..

تصدق بديت احس بمفارقك بعدين ،

عذاب الطريق اللي مشيت وتساهلته ..

ذكرتك وانا من عادتي ما اذكر المقفين ،

زماني بدونك كارثه ماتقبلته ..

انا اذكر تعاهدنا ودعيت انت وقلت امين ،

عسى حبنا ب اعلى المراقيب منزلته ..

انا و انت ماننسى بعض دامنا حيين ،

هذا عهدنا ولا انت ناس وبدلته ..

عموما انا ماقلت هذا عشان تلين ،

نصيبي حصل لو كان ما بيه حصلته ..

فمان الكريم وجعل ربي بعدك يعين ،

فداك الخطا كله من اخره لاولته ..

مرد الليالي كان شانت معاي تزين ،

وياكم واحد راضته قبلي مزعلته ..

يجيب الزمن غالي يكفي عن الغالين ،

ينسيك كل الناس من يوم قابلته ..

واذا كان لي دين عندك فداك الدين ،

وقلبك من العهد القديم انت حللته ..

انا قلت كل اللي على خاطري الحين ،

ولاعاد باقي شي للحين ماقلته ..