ما ل الحزن غير القلوب النبيلة

ما ل( الحزن ) غير القلوب النبيلة

لو غاب عنها ، ما تحمّل وجاها

تشتاق له ، وتحنّ له كل ليلة

ويموت فيها ، ويتنكد بلاها

لو ما عطاها من كثيره ، قليله

ما بلّ يابسها ، ولا اروى ضماها

لو ما هجدها لين يشفي غليله

اصبح عليها الصبح ، تطلب رضاها

لو ما ترك همّه ، ودمعه ، وويله

فيها ، تشك إنّه عشيق ل( سواها )

لو ما بعث فيها وصاله ، قتيلة

لو ما قتل فيها غيابه ، نعاها

لو ما تكرّم بالزيارة ، بخيلة

لو ما عطاها ، ما تجود ب( عطاها )

لو ما خذا منها حضوره ، جميلة

لو يآخذه ، ما كنّ ربي حلاها

لو حبّها ، وأكرم نزلها ، خليله

لو صدّ عنها ، تحسب إنّه خطاها

غاية وصل تبحث عن اية وسيلة

قصة عشق تثمل خفوقٍ قراها

حكيتها ل( أهل ) القلوب النبيلة

ما به حزين ب( نُبْل ) حزني حكاها