ملامحك في غيهب العمر يا وجهٍ جلا
شكّلتها من ماي قلبي وطين الذاكرة
فيما روت جدب الخطايا عن الما والكلا
وأنا أتوهم ذبحة الشك واقطع دابره
ترعى خيالي شرّد البال وأقرا ما تلا
شيٍ قديم من التفاصيل ماني فاكره
قلت اسردي يا شهر زاد الحقيقة للملا
مشبوه بالحيرة ومنفي عن أول وآخره
لا الصمت يسعفنا ندوّر على انفسنا.. ولا
هذا الحديث يرد ماضي لقانا حاضره
قالت خذ الموضوع بين التراضي والغلا
وان ما خذيته لا أنت خاسر ولاني خاسرة
وأمعنت في نجمٍ تكسّر على ظهر الخلا
نوره طفى تحت الثريا.. وناره سافرة
لين أينعت في صخرة الياس ريحانة غلا
وأبديت عن شرح الكتابة نسيج الخاطرة
وان كنت بالنسيان سميتها "دفعة بلا"
سمي حوادثها على قد ما انتي ذاكرة
وشلون ينسى وارد العد ميّاح الدلا
لا شلهبت كبد الصحاري سموم الهاجرة
تبقين ما ودعْك صدر المحب ولا قلى
يا ضحكةٍ ما تشبه إلا القلوب النادرة
شكلتها من ماي قلبي وفازت بالولا
وأخْذت منابتها الندية بطين الذاكرة