الحزن للقلب ولراعيه تنهيده
لا ميّل الليل غصن وطاح عنقوده
أقطف سهر ويتمادى الشوق ويزيده
حلم الوصال بمدى ملحه وباروده
والعين لو تستريح بكل تسهيده
جف التعب.. والتعب ما يحتمل زوده
والعشق لا من تكسّر داخله قيده
تموت الاحلام مقتولة ومؤوده
يا ست الاحباب. قلبٍ جيتك ب عيده
يدّه من الشوق ملويّة وممدوده!
شوفيه لا مل من نبضه وترديده
يسترجع الذكريات ويكسر جموده
انتي ملاذه إذا اكتظوا حواسيده
وانتي وطن غربته لا جاوز حدوده
وانتي قريبة لو انك عني بعيده
تطير لك روح في لحظات معدوده
لا عربد الحزن وانكشفت تجاعيده
يلقى بحضنك وجوده يا اول وجوده