قررت ابا انظر للحياه بنظره اخرى من جديد
حتّى أشوف الصحّ صحٍ والخطا آشوفه خطا
مافيه عند الله بيوم الحشر سادات وعبيد
كلٍ يوقّف عند ربّه عاري بليّا غطا
والناس ماتقدر تمشّيهم على رايٍ وحيد
كلٍ له اطبوع ونُظُم واريا لو الناس اخلطا
احدٍ قريبه نظرته وأحدٍ مدى فكره بعيد
وأحدٍ تقدّيه النشاما والتجارب والبطا
وأحدٍ دَلَه وأحدٍ نسى وأحدٍ يفيد ويستفيد
وأحدٍ سلوك الحقد في قلبه نطاها اللي نطا
وأحدٍ يحصّل مطلبه لكن بعد جهدٍ جهيد
مايدري ان الله ليا منّه عطا عبده عطا
ولاهل الفكر ندوة مواضيعٍ وللفرسان ميد
كلٍ على وجهة مجاله للصعيبات امتطا
وعند الحوادث بالزمن تظهر هل الراي السديد
ياقامت اكبار الفتن تنعق مثل نعق القطا
مار اطلب الله ربّي اللي يبدي الخلق ويعيد
انّه يعين الصابر اللي جرحه بقلبه سطا
مااملك دهاء مْعاويه وادراك هارون الرشيد
لكن تجاربنا تعلّمنا الصحيح مْن الخطا