ياعقاب ابن شامان ياشوق شما
عز الخوي لاصار بالعلم علمين
يافزعة اللي خمه الوقت خما
نسل القروم مرجحين الموازين
ياطيب راسك ياالعريب المسما
بالمرجله والطيب والعز والدين
لميتها من طنخة الراس لما
ماتقصر فعولك على العسر واللين
خابرك في وقت اللوزام تتما
وترد من صاع المواجيب صاعين
عديتها مابين خالٍ وعما
ولاجيت ابا اشكي لك من القل والدين
الخير خص وباقي الشر عما
وانا اسير الضيق مابين نارين
الأوله من بين كوعٍ وكما
والثانيه تحت القدم من زمانين
والقربه اللي جوفها مستسما
تروي قبل لايندفن روس ضامين
جتك الرساله وانتبه لاتزما
والطير مايكفخ بليا جناحين
يالشاعر اللي ماكسر كل ضما
شاعر وشعرك مااختلف بينه اثنين
احفظ جوابي داخل القلب صما
والرد يكفي منك لو كان بيتين