بَيتْ بَيت بَيتْ ...
ليل نهار تنْبحي
بدَك بيت !
يلعن حيطان لبيوت يا فاطمي
ليش يا بنت الناس
عَمْ تتناسي الأساس ؟
إتذكري وَعدك يوم عرفتك
وقلتلكْ :
"رح أبني لِكْ بيت بعيوني
أزيْنو بقلبي وروحي
واسيجو بجفوني ! "
إتذكري كيف ساعتها بكيتي
وقلتي :
"حبيبي يسلم عيونك
حبيبي زينتلي سياجي
ومهجتي ..
ما بدي منك إشي !
ما بدي لا عمارات
لا طوابق ولا بيوت !
ما بدي غير أشوفك ..
وما يهمني بعدين
إن أنا عايشي ظليت
ولا مثل فرخه مريضه صرت
أشهق وموت ! "
_ أذكر أذكر يا غالي
وأنا يا روحي
وعدي ببالي
وعلى راسي الأساس
لكن يا تقبرني :
بدناش مطبخ ؟!
بدناش يا أهل الله منافع ؟!
ولولاد ؟
لولاد كبرو !
كبرو يا "جارنا "علي لولاد!
بدناش يا عمري :
غرفي للولاد ؟!